اسلام آباد(پی این ایچ)بلوچستان کے ضلع مستونگ میں سیکیورٹی فورسز کے آپریشن میں فتنتہ الہندوستان کے 3 دہشتگرد ہلاک ہوگئے، فائرنگ کے شدید تبادلے میں میجر زید سلیم اور سپاہی نظم حسین مادر وطن پر قربان ہوگئے۔انٹر سروسز پبلک ریلیشنز ( آئی ایس پی آر ) کے مطابق سیکیورٹی فورسز نے ضلع مستونگ میں بھارتی سرپرستی میں سرگرم دہشت گرد تنظیم فتنہ الہندستان کی موجودگی کی اطلاع پر انٹیلی جنس بیسڈ آپریشن کیا۔اس دوران سیکیورٹی فورسز نے دہشت گردوں کے ٹھکانے کو مؤثر طریقے سے نشانہ بنایا اور دوران آپریشن تین دہشت گردوں کو ہلاک کردیا تاہم فائرنگ کے شدید تبادلے میں، مادرِ وطن کے بہادر سپوت میجر زید سلیم اول ( عمر 31 سال، سکنہ خوشاب) جو فرنٹ لائن سے اپنے دستے کی قیادت کر رہے تھے، دشمن کا بہادری سے مقابلہ کرتے ہوئے جام شہادت نوش کر گئے، ان کے ہمراہ سپاہی نظم حسین ( عمر 22 سال، سکنہ جہلم) بھی شہید ہو گئے۔
